Letras galegas 2025

O latexo da tradición

Neste 2025, as letras galegas  queren poñer en valor ás pandeireteiras, mulleres que fixeron da pandeireta e da súa voz unha ferramenta de resistencia e de transmisión cultural. O seu ritmo foi a base da nosa música popular e, a través destas lecturas, queremos que o alumnado coñeza a importancia deste patrimonio inmaterial.

O 17 de maio é unha data sinalada para toda Galicia: o Día das Letras Galegas, unha xornada para celebrar a nosa lingua e a riqueza cultural que nos define como pobo. Este ano, desde a biblioteca queremos propoñervos unha selección de libros moi especiais que teñen como fío condutor a música, a tradición oral e o orgullo pola nosa identidade.

De 3 a 5 anos

Coas miñas mans

• Autor: Pablo Díaz
• Editorial: Galaxia

Un libro musical que propón un xogo didáctico a través das mans. Con ilustracións cheas de cor e letras sinxelas, “Coas miñas mans” é ideal para traballar a psicomotricidade, o ritmo e a expresión corporal nos máis pequenos. Ao tempo que se canta, tamén se aprende a contar, recoñecer as cores, falar das estacións ou dos alimentos. Acompañado de cancións que poden ser interpretadas cos dedos, este libro transforma a lectura nun espazo de xogo e descubrimento.

Non hai berce coma o colo

• Autor: Paulo Nogueira
• Editorial: Kalandraka

Un libro-disco que recolle arrolos tradicionais galegos, transmitindo a calor do berce e a tradición oral de xeración en xeración. Cada canción está reinterpretada por grandes artistas da nosa terra, ofrecendo melodías doces e coidadas que invitan á calma e á tenrura. Unha proposta perfecta para manter viva a tradición musical galega nas primeiras idades, espertando nos pequenos o gusto pola nosa cultura a través do son.

De 5 a 6 anos

A nena e o grilo / A nena e o grilo nun barquiño

• Autor: Magín Blanco García
• Editorial: OQO Editora

Magín Blanco crea un universo máxico e musical onde A Nena e o Grilo son protagonistas de historias cheas de imaxinación e valores. Estes contos cantados falan de amizade, liberdade e diversidade, cun ton alegre e pegadizo. O libro complétase con cancións que animan á participación activa das nenas e nenos, facendo que a lectura sexa tamén unha experiencia musical. A Nena e o Grilo viaxan a lugares onde non existen as fronteiras e onde todo é posible grazas á creatividade.

De 7 a 9 anos

Sei cantar e sei bailar

• Autora: Eva Mejuto
• Editorial: Xerais

Este álbum ilustrado é unha homenaxe á memoria das mulleres que, de maneira anónima, mantiveron viva a nosa música, poesía e cultura popular ao longo dos séculos. A autora destaca o labor das pandeireteiras e de todas aquelas mulleres que, sen recoñecemento, transmitiron o noso patrimonio oral e musical. As ilustracións delicadas e a linguaxe poética fan deste libro unha lectura emotiva que axuda a comprender a importancia da tradición e da voz feminina na cultura galega.

De 10 a 12 anos

Sáínza a Punkireteira

• Autora: María Canosa
• Editorial: A Costureira Edición

Un álbum ilustrado dirixido á rapazada e á adolescencia que mestura tradición e modernidade cun ton rebelde e divertido. Sáínza, a protagonista, é unha nena que reivindica a natureza, a lingua galega e a música tradicional ao tempo que rompe cos estereotipos, mostrando que tamén hai sitio para o punk, os zocos e a pandeireta nun mesmo escenario. A historia convida a reflexionar sobre a diversidade e o valor de manter vivas as raíces, mesmo cando as expresamos dunha maneira diferente ou máis actual.

Galicia: MusiCalidade

• Autor: Noel Turbulencias
• Editorial: Verkami

Un libro ilustrado que percorre a música galega contemporánea, amosando a diversidade de estilos e artistas que forman parte do noso panorama musical. Desde o legado dos míticos Golpes Bajos ou Siniestro Total ata bandas e propostas actuais como Grande Amore ou The Rapants, pasando polo folk de Carlos Núñez ou o punk de Terbutalina. Galicia: MusiCalidade é unha homenaxe ao carácter aberto e plural da nosa música e ao espírito creativo que caracteriza aos músicos galegos de todas as épocas.